மாணவர் முரசு
இ-பேப்பர்
காகங்களைப் பிடிக்க பொறி அமைத்தது குறித்து புக்கிட் பாஞ்சாங் குடியிருப்பாளர் ஒருவரின் கவலைகளுக்குத் தேசிய பூங்காக் கழகம் பதிலளித்துள்ளது.
ஜூன் 23ஆம் தேதி காலை சுமார் 8.30 மணியளவில் ஃபாஜார் ரோடு, புளோக் 401ல் உள்ள பொறியில் பறவைகளைக் கண்ட ஸ்டோம்ப் இணையவாசியான மேடி, அவை துன்பப்படுவதாக கூறினார்.
காகங்களுக்கு இந்த உலகில் வாழ உரிமை உண்டு என்று தான் நம்புவதாக மேடி கூறினார். மேலும், “ஸ்டோம்ப் தளம் இந்தப் பறவைகளுக்கு நீதியையும் கருணையையும் கொண்டு வர முடியும் என்று நான் நம்புகிறேன்,” என்றும் கூறினார்.
ஸ்டோம்ப்பின் கேள்விக்குப் பதிலளிக்கும் விதமாக, தேசிய பூங்காக் கழகத்தின் வனவிலங்கு மேலாண்மைப் பிரிவு இயக்குநரான திரு ஹாவ் சூன் பெங், “வீட்டுக் காகங்கள் பூர்வீகமற்ற, ஆக்கிரமிப்பு இனமாகும். அவை பூர்வீக பல்லுயிர் பெருக்கத்திற்கு அச்சுறுத்தலாக இருக்கின்றன,” என்று விளக்கினார்.
“சுகாதாரத்துக்கு அச்சுறுத்தலாக உள்ள பறவை இனங்களை நிர்வகிப்பதற்கு கழகம் ஒரு முழுமையான, அறிவியல் அடிப்படையிலான அணுகுமுறையை கடைப்பிடிக்கிறது. இதில் உணவு மூலக் குறைப்பு, வாழ்விட மாற்றம், மக்கள் தொகை கட்டுப்பாடு போன்ற நடவடிக்கைகள் அடங்கும்.
“பறவைகளின் சுற்றுச்சூழலைப் புரிந்துகொள்ள கழகம் ஆய்வுகளை நடத்துகிறது. அதாவது அவற்றின் கூடு கட்டும் முறைகள், அசைவுகள் போன்றவை அதில் அடங்கும். இப்பகுதியில் காகங்களின் எண்ணிக்கையை நிர்வகிப்பதற்கான நடவடிக்கைகளின் ஒரு பகுதியாக, காகக் கூடுகள் தொடர்ந்து அகற்றப்படுவதுடன் காகங்களும் பிடிக்கப்பட்டு அகற்றப்படுகின்றன,” என்றும் விளக்கப்பட்டது.
ஸ்டோம்ப் இணையவாசி பார்த்த காகப் பொறி ஜூன் மாத நடுப்பகுதியில் வைக்கப்பட்டது.
“பிடிக்கப் பயன்படுத்தப்படும் கூண்டில் நிழல் அளிக்க ஒரு பாதுகாப்பான பகுதி உள்ளது, மேலும் பறவைகளுக்காக ஒரு கிண்ணம் தண்ணீர் வைக்கப்பட்டுள்ளது. சிக்கியுள்ள காகங்களும் நாளின் இறுதிக்குள் அனுதினமும் பொறிகளில் இருந்து மீட்கப்படுகின்றன,” என்று திரு ஹாவ் மேலும் கூறினார்.
காகங்களின் எண்ணிக்கை பெருக்கத்தைக் குறைக்க, காகங்களுக்கு உணவளிப்பதைத் தவிர்க்கவும், உணவு மிச்சங்கள் முறையாக அப்புறப்படுத்தப்படுவதை உறுதி செய்யவும் தேசிய பூங்காக் கழகம் அறிவுறுத்துகிறது.
வனவிலங்குச் சட்டத்தின் கீழ் வனவிலங்குகளுக்கு உணவளிப்பது ஒரு குற்றமாகும். முதல் முறை குற்றவாளிகளுக்கு $5,000 வரை அபராதமும், அடுத்தடுத்த குற்றங்களுக்கு $10,000 வரை அபராதமும் விதிக்கப்படலாம்.
சட்டவிரோத பறவைகளுக்கு உணவளித்தல் குறித்த கருத்துகளை கழகம் கண்காணித்து, தீவிர அமலாக்கத்தை மேற்கொள்வதாக திரு ஹாவ் கூறினார். இதில், உணவு வழங்குவதாக அடையாளம் காணப்பட்ட இடங்களில் நேரடிக் கண்காணிப்பு, சிசிடிவி கேமராக்கள் பொருத்துதல் ஆகியவை அடங்கும்.
“காகங்களின் எண்ணிக்கையை நிர்வகிப்பதற்கு பல அமைப்புகள், நகர மன்றங்களின் ஒத்துழைப்பு தேவை” என்று திரு ஹாவ் பகிர்ந்து கொண்டார்.
உணவு நிலையங்களிலும் குப்பைக் கழிவு மையங்களிலும் குப்பையை முறையாக நிர்வகித்தல், உயரமான இடங்களிலிருந்து குப்பை போடுவதைக் தடுப்பது போன்ற மனிதனால் உருவாக்கப்பட்ட உணவு தொடர்பான நடவடிக்கைகளைக் குறைப்பதும் இதில் அடங்கும் என்று கழகம் விவரித்தது.
