மாணவர் முரசு
இ-பேப்பர்
தமிழில் வசூலில் அசத்திய 'அசுரன்' படத்தின் கன்னட மறுபதிப்பு உருவாவது உறுதியாகி உள்ளது. கன்னடத்தில் சிவராஜ்குமார் நாயகனாக நடிப்பார் என கூறப்படுகிறது.
வெற்றிமாறன் இயக்கத்தில் தனுஷ், மஞ்சு வாரியர் ஜோடி சேர்ந்து நடித்த படம் 'அசுரன்'. பிரகாஷ் ராஜ், பசுபதி, கென் கருணாஸ் உள்ளிட்ட பலர் நடித்திருந்தனர்.
சில எதிர்மறை விமர்சனங்களைப் பெற்றாலும் வசூல் ரீதியில் பிரமாண்ட வெற்றியைப் பெற்றிருந்த 'அசுரன்' படத்தின் பிற மொழி மறுபதிப்புக்கான உரிமையைப் பெறுவதில் பலத்த போட்டி நிலவியது.
இதன் தெலுங்கு மறுபதிப்பு உரிமையை சுரேஷ் புரொடக்ஷன்ஸ் பெற்றுள்ளது. தனுஷ் நடித்த கதாபாத்திரத்தில் நடிகர் வெங்கடேஷ் ஒப்பந்தமாகியுள்ளார். படப்பிடிப்பு முன்பே துவங்கி விட்டது.
எனினும் கொரோனா கிருமி அச்சம் காரணமாக படப்படிப்பு தடைபட்டுள்ளது.
இந்நிலையில் 'அசுரன்' கன்னட மறுபதிப்பு உரிமையைப் பெறுவதற்கு சில முன்னணி நாயகர்கள் மத்தியில் போட்டி அதிகரித்தது. எனினும் இறுதியில் சிவராஜ்குமார் இதில் நடிப்பது உறுதியாகி விட்டதாம். இப்படத்தை ஜேக்கப் வர்கீஸ் இயக்குவார் என்றும் அதிகாரப்பூர்வ தகவல் விரைவில் வெளியாகும் என்றும் கூறப்படுகிறது.
சிவராஜ்குமார் கன்னடத்தில் நடித்து பெரும் வெற்றி பெற்ற 'ஜோகி' படம்தான் தமிழில் 'பரட்டை என்கிற அழகுசுந்தரம்' என்ற தலைப்பில் தனுஷ் நடிக்க உருவானது. இப்போது தனுஷ் நடித்த 'அசுரன்' படத்தின் கன்னட மறுபதிப்பில் சிவராஜ்குமார் நாயகனாகிறார்.